ಮೂರ್ತಿ ಪೂಜೆ ಹಿಂದೂ ಧರ್ಮದ ಅದ್ಭುತ ಕಲ್ಪನೆ: ಡಾ.ನಾಗರಾಜ

ಬೈಂದೂರು: ಪ್ರಾಚೀನ ಕಾಲದಲ್ಲಿ ಮನುಷ್ಯ ಜ್ಞಾನ ಮಾರ್ಗ, ಭಕ್ತಿ ಮಾರ್ಗ ಹಾಗೂ ಕರ್ಮ ಮಾರ್ಗಗಳ ಮೂಲಕ ಭಗವಂತನನ್ನು ಕಾಣುತ್ತಿದ್ದರು. ಬಳಿಕ ಪ್ರಕೃತಿ ಆರಾಧಕರಾಗಿ ಪ್ರಕೃತಿಯಿಂದ ದೇವರನ್ನು, ಕ್ರಮೇಣ ಮೂರ್ತಿ ಪೂಜೆ ಆರಾಧಕರಾಗಿ ಮೂರ್ತಿಯಿಂದ ಭಗವಂತನನ್ನು ಕಾಣುತ್ತಿದ್ದಾನೆ. ಮೂರ್ತಿ ಪೂಜೆ ಧರ್ಮ ಶಾಸ್ತ್ರವನ್ನು ಬಿಂಬಿಸುತ್ತಿದ್ದು, ಇದು ಹಿಂದೂ ಧರ್ಮದ ಅದ್ಭುತ ಕಲ್ಪನೆ ಎಂದು ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಕಾಲೇಜಿನ ಪ್ರಾಧ್ಯಾಪಕ ಡಾ.ನಾಗರಾಜ ಪೂಜಾರಿ ಹೇಳಿದರು. 

ಬಿಜೂರು ಅರೆಕಲ್ಲು ಶ್ರೀ ದುರ್ಗಾಪರಮೇಶ್ವರಿ ದೇವಳದ ನೂತನ ಶಿಲಾಮಯ ಗರ್ಭಗುಡಿಯ ಸಮರ್ಪಣೆ, ನೂತನ ಬಿಂಬ ಪ್ರತಿಷ್ಠೆ ಮತ್ತು ಸಪರಿವಾರ ದೇವರುಗಳ ಪ್ರತಿಷ್ಠೆ ಕಾರ್ಯಕ್ರಮದ ಧಾರ್ಮಿಕ ಸಭೆಯಲ್ಲಿ ಸೋಮವಾರ ಧಾರ್ಮಿಕ ಉಪನ್ಯಾಸ ನೀಡಿದರು. 

ಮನುಷ್ಯ ಕೇವಲ ಮೂರ್ತಿ ಪೂಜೆಯನ್ನು ಮಾಡಿದರೇ ಸಾಲದು, ಆ ಮೂರ್ತಿಯಲ್ಲಿರುವ ಸಂಕೇತವನ್ನು ಅರ್ಥೈಸಿಕೊಂಡು, ಅದನ್ನು ತಮ್ಮ ಮಕ್ಕಳಿಗೂ ತಿಳಿಯಪಡಿಸಬೇಕು. ದೇವರ ಮೂರ್ತಿಯಲ್ಲಿರುವ ಚಕ್ರ ಧರ್ಮವನ್ನು ಸೂಚಿಸುತ್ತದೆ. ಮನುಷ್ಯನಿಗೆ ಧರ್ಮದ ಚಕ್ರ ತಪ್ಪಿದಾಗ ಎಲ್ಲವೂ ನಾಶವಾಗುತ್ತದೆ. ಅದೇ ರೀತಿ ಶಂಖ ಶುಭ್ರವಾದ ಮನಸ್ಸು ಹಾಗೂ ಖಡ್ಗ ಆಧ್ಯಾತ್ಮಿಕ ಜ್ಞಾನವನ್ನು ಸೂಚಿಸುತ್ತಿದ್ದು, ಮನುಷ್ಯನಿಗೆ ಆಧ್ಯಾತ್ಮಿಕ ಜ್ಞಾನವಿದ್ದರೆ ಮಾತ್ರ ಧರ್ಮ ಪಾಲನೆ ಸಾಧ್ಯವಾಗುತ್ತದೆ ಎಂದರು. 

ಕರಾವಳಿಯಲ್ಲಿ ಪ್ರತಿವರ್ಷ ನೂರಾರು ದೇವಾಲಯಗಳು ಜೀರ್ಣೋದ್ಧಾರಗೊಳ್ಳುತ್ತಿದೆ, ಆದರೆ ನಮ್ಮ ಚಿಂತನೆ, ನಡಾವಳಿಕೆಗಳು ಜೀರ್ಣೋದ್ಧಾರಗೊಳ್ಳದೇ ಕಳ್ಳತನ, ದರೋಡೆ, ವಂಚನೆಯಂತಹ ಘಟನೆಗಳು ಹೆಚ್ಚುತ್ತಿರುವುದು ದುರ್ದೈವದ ಸಂಗತಿ. ಇಂದು ದೇವರ ಮೇಲಿನ ಭಕ್ತಿ ಆಡಂಭರಕ್ಕೆ ಹಾಗೂ ವ್ಯವಹಾರಕ್ಕೆ ಮಾತ್ರ ಸೀಮಿತವಾಗುತ್ತಿದ್ದು, ಆತ್ಮಪ್ರಶಂಸೆಗಾಗಿ ಮಾತ್ರ ಭಕ್ತಿ ಮಾಡಬೇಕು. ಶೃದ್ಧೆಯಿಲ್ಲದ ಪೂಜೆ ಸುಖವಿಲ್ಲ. ಭಕ್ತಿಯ ವೈಭವೀಕರಣ ಕಡಿಮೆಯಾಗಬೇಕು ಎಂದರು. 

ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಉದ್ಯಮಿ ಬಿ.ಎಸ್ ಸುರೇಶ ಶೆಟ್ಟಿ ಮಾತನಾಡಿ, ಇಂದಿನ ಮಕ್ಕಳಿಗೆ ಎಳವೆಯಲ್ಲಿ ಧರ್ಮ ಧಾರ್ಮಿಕತೆಯ ಬಗ್ಗೆ ಅರಿವು ಮೂಡಿಸಿ ಸಂಸ್ಕಾರವಂತರನ್ನಾಗಿ ಮಾಡಬೇಕಾಗಿದೆ. ಆಗ ಮಾತ್ರ ಭವಿಷ್ಯದಲ್ಲಿ ಉತ್ತಮ ಸಮಾಜ ನಿರ್ಮಾಣ ಸಾಧ್ಯವಾಗುತ್ತದೆ ಎಂದರು. 

ಮಾಜಿ ಶಾಸಕ ಕೆ. ಲಕ್ಷ್ಮೀನಾರಾಯಣ ಉದ್ಘಾಟಿಸಿದರು. ದೇವಳದ ಜೀರ್ಣೋದ್ಧಾ ಸಮಿತಿ ಅಧ್ಯಕ್ಷ ರಾಮಕೃಷ್ಣ ಶೇರೆಗಾರ ಅಧ್ಯಕ್ಷತೆ ವಹಿಸಿದ್ದರು. 

ಜಿಲ್ಲಾ ಪಂಚಾಯಿತಿ ಸದಸ್ಯ ಗೌರಿ ದೇವಾಡಿಗ, ಗ್ರಾಮ ಪಂಚಾಯಿತಿ ಅಧ್ಯಕ್ಷ ಕೃಷ್ಣಮೂರ್ತಿ, ಯು.ನಾರಾಯಣ ಭಟ್, ಅರ್ಚಕ ಸುಬ್ಬಣ್ಣ ಭಟ್, ಉದ್ಯಮಿಗಳಾದ ಪದ್ಮನಾಭ ಕೊತ್ವಾಲ್, ರಮೇಶ ಬಿಜೂರು, ಶಿವರಾಮ ಗಾಣಿಗ, ಗ್ರಾಮ ಪಂಚಾಯಿತಿ ಸದಸ್ಯ ಮಂಜು ದೇವಾಡಿಗ, ದೇವಳದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ರಾಜೇಂದ್ರ ಎಸ್.ಜೀರ್ಣೋದ್ಧಾರ ಸಮಿತಿ ಕಾರ್ಯದರ್ಶಿ ಸುಬ್ರಹ್ಮಣ್ಯ ಬಿಜೂರು ಉಪಸ್ಥಿತರಿದ್ದರು. 

ಈ ಸಂದರ್ಭ ದೇವಾಲಯ ನಿರ್ಮಾಣಕ್ಕೆ ಸಹಕರಿಸಿದ ದಾನಿಗಳನ್ನು ಸನ್ಮಾನಿಸಲಾಯಿತು. ಕೇಶವ ನಾಯ್ಕ ಮತ್ತು ಗಿರೀಶ ಶ್ಯಾನುಬಾಗ್ ಕಾರ್ಯಕ್ರಮ ನಿರೂಪಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com