ಜ. 21ರಿಂದ ಕಾರ್ಕಳ ಬಾಹುಬಲಿ ಮಹಾಮಸ್ತಕಾಭಿಷೇಕ

ಕಾರ್ಕಳ: ಕಾರ್ಕಳ ಶ್ರೀ ಬಾಹುಬಲಿಗೆ ಮಹಾಮಸ್ತಾಭಿಷೇಕವು ಜ. 21ರಿಂದ 31ರವೆರೆಗೆ ನಡೆಯಲಿದೆ ಎಂದು ಧರ್ಮಸ್ಥಳದ ಧರ್ಮಾಧಿಕಾರಿ ಹಾಗೂ ಕಾರ್ಕಳ ಬಾಹುಬಲಿ ಸ್ವಾಮಿ ಮಹಾಮಸ್ತಕಾಭಿಷೇಕ ಸಮಿತಿ ಅಧ್ಯಕ್ಷ ಡಾ.ಡಿ. ವೀರೇಂದ್ರ ಹೆಗ್ಗಡೆ ಹೇಳಿದ್ದಾರೆ. 

ಯಾತ್ರಿ ನಿವಾಸದಲ್ಲಿ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಶ್ರವಣಬೆಳಗೊಳದ ಗೋಮಟೇಶ್ವರನಿಗೆ ಒಂದು ಸಾವಿರ ವರ್ಷದ ಇತಿಹಾಸವಿದೆ. ಆ ಬಳಿಕ ಪ್ರೇರಣೆಗೊಂಡ ಶ್ರಾವಕ ಶ್ರಾವಕಿಯರು 1942ರಲ್ಲಿ ಕಾರ್ಕಳ ಗೋಮಟೇಶ್ವರನನ್ನು ಪ್ರತಿಷ್ಠಾಪಿಸಿದರು. ಬಳಿಕ ಇಲ್ಲಿಯ ಪ್ರೇರಣೆಯಿಂದ ವೇಣೂರು ಗೋಮಟೇಶ್ವರ ಪ್ರತಿಷ್ಠಾಪನೆಗೊಂಡಿತು. ನನ್ನ ತೀರ್ಥರೂಪರಾಗಿರುವ ರತ್ನವರ್ಮ ಹೆಗ್ಗಡೆಯವರು 39 ಅಡಿಯ ವಿಗ್ರಹವನ್ನು ಧರ್ಮಸ್ಥಳದಲ್ಲಿ ಪ್ರತಿಷ್ಠಾಪಿಸಿದರು. ಇದೀಗ ಉತ್ತರ ಭಾರತದಲ್ಲಿ 25ರಿಂದ 30 ಅಡಿಯ ವಿಗ್ರಹಗಳು ನಿರ್ಮಾಣಗೊಳ್ಳುತ್ತಿವೆೆ ಎಂದು ಹೇಳಿದರು. 

ಕಾರ್ಕಳ ಬಾಹುಬಲಿಯು ಒಂದು ವರ್ಗದ ಜನತೆಗೆ ಸೀಮಿತವಾಗಿರದೆ, ಸರ್ವಧರ್ಮದ ಜನತೆಯು ಇಲ್ಲಿ ಮಸ್ತಕಾಭಿಷೇಕವನ್ನು ಹಬ್ಬವಾಗಿ ಆಚರಿಸುತ್ತಿದ್ದಾರೆ. ಇದು ವಿಶ್ವಕ್ಕೆ ಶಾಂತಿಯ ಸಂದೇಶವನ್ನು ಕೊಡುತ್ತದೆ. ದೈನಂದಿನ ಬದುಕಿನಲ್ಲಿ ಅನೇಕ ಕಾರಣಗಳಿಂದ ಎಲ್ಲ ಕ್ಷೇತ್ರದಲ್ಲೂ ಭಿನ್ನಾಭಿಪ್ರಾಯ ಉದ್ಭವಿಸುತ್ತದೆ. ಆದರೆ ಧರ್ಮದ ಮೂಲದಿಂದ ನಮಗೆ ಶಾಂತಿ ದೊರೆಯುತ್ತದೆ. ಸಮಾಜದಲ್ಲಿ ಪರಸ್ಪರ ಶಾಂತಿ, ಸಹಬಾಳ್ವೆ ಹಾಗೂ ಸಾಮರಸ್ಯವನ್ನು ಹೆಚ್ಚಿಸುವಂಥ ಹಬ್ಬವಾಗಿ ಈ ಮಸ್ತಾಭಿಷೇಕ ಮೂಡಿಬರುತ್ತದೆಯೇ ಹೊರತು, ಕೇವಲ ವಿಗ್ರಹಕ್ಕೆ ಅಭಿಷೇಕಕ್ಕಾಗಿ ಈ ಹಬ್ಬ ಸೀಮಿತವಾಗದು ಎಂದರು. 

ಮಸ್ತಾಭಿಷೇಕದ ಹಿನ್ನೆಲೆಯಲ್ಲಿ ಅನೇಕ ಜನಕಲ್ಯಾಣ ಕಾರ್ಯಗಳು ನಡೆಯಲಿದ್ದು, ಶಾಶ್ವತ ತ್ಯಾಗಿ ಭವನ, ವಿದ್ಯಾರ್ಥಿ ನಿಲಯ, ಕೆರೆ ಬಸದಿ ಜೀರ್ಣೋದ್ಧ್ದಾರ ಮುಂತಾದ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದ್ದೇವೆ ಎಂದರು. ಮಸ್ತಕಾಭಿಷೇಕ ಸಮಿತಿ ಕಾರ್ಯಾಧ್ಯಕ್ಷರಾಗಿ ಎಂ.ಎನ್. ರಾಜೇಂದ್ರ ಕುಮಾರ್, ಕಾರ್ಯದರ್ಶಿಯಾಗಿ ನ್ಯಾಯವಾದಿ ಎಂ.ಕೆ. ವಿಜಯಕುಮಾರ್ ಹಾಗೂ ಇತರ ಪದಾಧಿಕಾರಿಗಳ ಆಯ್ಕೆಗೊಂಡಿದ್ದು, ಇವರೆಲ್ಲರ ಜತೆ ಸಾರ್ವಜನಿಕರು ಹಾಗೂ ಸ್ಥಳೀಯರು ಸೇರಿಕೊಂಡು ಈ ಮಹಾನ್ ಕಾರ್ಯವನ್ನು ಯಶಸ್ವಿಗೊಳಿಸಬೇಕೆಂದು ಮನವಿ ಮಾಡಿದರು. 

ಸರಕಾರದ ಪ್ರತಿನಿಧಿಯಾಗಿ ಸಚಿವ ಅಭಯಚಂದ್ರ ಜೈನ್ ನಮ್ಮ ಜತೆಗಿದ್ದು, ಸರಕಾರದಿಂದ ದೊರೆಯುವ ಎಲ್ಲ ಸವಲತ್ತುಗಳನ್ನು ಒದಗಿಸಿಕೊಡಲಿದ್ದಾರೆ. ಜತೆಗೆ ಎಲ್ಲ ಇಲಾಖೆಗಳ ಸಹಕಾರ ನಮಗೆ ಬೇಕಾಗಿದ್ದು, ಆ ವ್ಯವಸ್ಥೆಯನ್ನು ಕೂಡ ಸಚಿವರು ಮಾಡಿಕೊಡಲಿದ್ದಾರೆ ಎಂದರು. 

ಸುದ್ದಿಗೋಷ್ಠಿಯಲ್ಲಿ ಜೈನ ಮಠದ ಲಲಿತಕೀರ್ತಿ ಭಟ್ಟಾರಕಪಟ್ಟಾಚಾರ್ಯವರ್ಯ ಸ್ವಾಮೀಜಿ, ಸಚಿವ ಅಭಯಚಂದ್ರ ಜೈನ್, ಸಮಿತಿ ಕಾರ್ಯಾಧ್ಯಕ್ಷ ಎಂ.ಎನ್. ರಾಜೇಂದ್ರ ಕುಮಾರ್, ಕಾರ್ಯದರ್ಶಿ ಎಂ.ಕೆ. ವಿಜಯಕುಮಾರ್, ಮೋಹನ್ ಪಡಿವಾಳ್, ಮಹಾವೀರ ಹೆಗ್ಡೆ ಅಂಡಾರು, ಸುನಿಲ್ ಕುಮಾರ್ ಬಜಗೋಳಿ, ಪಾರ್ಶ್ವನಾಥ ಜೈನ್ ಮತ್ತಿತರರು ಉಪಸ್ಥಿತರಿದ್ದರು.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com