ಆರ್ಥಿಕಾಭಿವೃದ್ಧಿ ಹಾಗೂ ಸ್ವಾವಲಂಬನೆ ಬ್ಯಾಂಕಿನ ಮುಖ್ಯ ಗುರಿ: ಡಾ| ಎಂ.ಎನ್‌.ಆರ್

ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ನ 71ನೇ ಶಾಖೆ ಉದ್ಘಾಟನೆ

ಕುಂದಾಪುರ : ಗ್ರಾಮೀಣ ಪ್ರದೇಶದ ಜನರ ಆರ್ಥಿಕಾಭಿವೃದ್ಧಿ ಹಾಗೂ ಸ್ವಾವಲಂಬನೆ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕಿನ ಮುಖ್ಯ ಗುರಿಯಾಗಿದ್ದು, ಈ ನಿಟ್ಟಿನಲ್ಲಿ ಗ್ರಾಮಾಂತರ ಪ್ರದೇಶಗಳಲ್ಲಿ ನೂತನ ಶಾಖೆಗಳನ್ನು ತೆರೆಯಲಾಗುತ್ತಿದೆ ಎಂದು ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕಿನ ಅಧ್ಯಕ್ಷ ಡಾ| ಎಂ.ಎನ್‌. ರಾಜೇಂದ್ರ ಕುಮಾರ್‌ ಹೇಳಿದರು.
           ಅವರು ಸೋಮವಾರ ಗಂಗೊಳ್ಳಿಯ ಮ್ಯಾಂಗನೀಸ್‌ ರಸ್ತೆ ಸಮೀಪದ ಮಲ್ಯ ಕಾಂಪ್ಲೆಕ್ಸ್‌ನಲ್ಲಿ ಎಸ್‌ಸಿಡಿಸಿಸಿ ಬ್ಯಾಂಕಿನ 71ನೇ ಶಾಖೆಯ ಉದ್ಘಾಟನಾ ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
        ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಶತಮಾನೋತ್ಸವ ಆಚರಣೆಯಲ್ಲಿದ್ದು 100 ಶಾಖೆ ತೆರೆಯುವ ಉದ್ದೇಶ ಹೊಂದಲಾಗಿದೆ. ಮುಂದಿನ 38 ದಿನಗಳಲ್ಲಿ ಹೊಸ 11 ಶಾಖೆ ತೆರೆಯಲಾಗುವುದು.  ದೇಶದಲ್ಲಿಯೇ ಸಶಕ್ತ ಸಹಕಾರಿ ಬ್ಯಾಂಕ್ ಎಂದು ಪರಿಗಣಿಸಲ್ಪಟ್ಟಿರುವ ಡಿಸಿಸಿ ಬ್ಯಾಂಕ್‌ನ ಹೊಸ ಶಾಖೆ ತೆರೆಯಲು ಇಲಾಖೆಯ ಕೆಲವೊಂದು ತೊಡಕು ಎದುರಾಗಿದೆ. ಆದಾಗಿಯೂ ಉದ್ದೇಶ ಈಡೇರಿಕೆ ನಿಟ್ಟಿನಲ್ಲಿ ನಮ್ಮ ಪ್ರಯತ್ನ ಮುಂದುವರಿಸಲಾಗುವುದು ಎಂದು ಹೇಳಿದ ಅವರು, ಹೊಸ ಶಾಖೆಯ ಆರಂಭಕ್ಕೆ ಮೊದಲಿನ 10 ದಿನಗಳಲ್ಲಿ 5 ಕೋಟಿ ರೂ. ಠೇವಣಿ ಸಂಗ್ರಹ, 1250 ಉಳಿತಾಯ ಖಾತೆ ರಚನೆಯಾಗಿದೆ. ಬಡಜನರ ಆರ್ಥಿಕ ಸ್ವಾವಲಂಬನೆ ನಮ್ಮ ಗುರಿ. 5 ಕೋಟಿ ಠೇವಣಿ ನೀಡಿರುವ ಗ್ರಾಹಕರನ್ನು ಗೌರವಯುತವಾಗಿ ನಡೆಸಿಕೊಳ್ಳುವುದರ ಜತೆಗೆ 50 ಕೋಟಿಗೂ ಮಿಕ್ಕಿ ಸಾಲ ನೀಡಲು ನಾವು ಬದ್ಧರಾಗಿದ್ದೇವೆ ಎಂದು ಅವರು ಹೇಳಿದರು. 

5 ಕೋಟಿ ರೂ. ಠೇವಣಿ
       ಪಂಚ ನದಿಗಳ ಸಂಗಮದ ಸ್ಥಳವಾದ ಗಂಗೊಳ್ಳಿಯಲ್ಲಿ ಬ್ಯಾಂಕ್‌ ಶಾಖೆಯ ಆರಂಭಿಸಲು ಉತ್ತಮ ಪ್ರೋತ್ಸಾಹ ಹಾಗೂ ಸ್ಪಂದನೆ ದೊರಕಿದ್ದು ಈಗಾಗಲೇ 5 ಕೋಟಿ ರೂ. ಠೇವಣಿ, 1,250 ಖಾತೆಗಳು ತೆರೆಯಲ್ಪಟ್ಟಿವೆ. ಈ ವರ್ಷದಲ್ಲಿ ಆರಂಭವಾಗುವ ಎಲ್ಲ ನವೊದಯ ಸ್ವಸಹಾಯ ಗುಂಪುಗಳ ಸದಸ್ಯರಿಗೆ ನವೋದಯ ಚಾರಿಟೆಬಲ್‌ ಟ್ರಸ್ಟ ಮೂಲಕ ಸಮವಸ್ತ್ರ ನೀಡಲಾಗುವುದು. ಸೇವೆಯೇ ನಮ್ಮ ಧರ್ಮ ಎನ್ನುವ ತಳಹದಿಯ ಮೇಲೆ ಬ್ಯಾಂಕು ಬೆಳೆದು ಬಂದಿದೆ ಎಂದು ರಾಜೇಂದ್ರ ಕುಮಾರ್‌ ತಿಳಿಸಿದರು.
          ನೂತನ ಶಾಖೆಯನ್ನು ಉದ್ಘಾಟಿಸಿದ ಶಾಸಕ ಗೋಪಾಲ ಪೂಜಾರಿ ಮಾತನಾಡಿ, ಗ್ರಾಮೀಣ ಪ್ರದೇಶದಲ್ಲಿ ಹೆಚ್ಚು ಶಾಖೆಗಳನ್ನು ತೆರೆಯುವ ಮೂಲಕ ಜನರ ಸ್ವಾವಲಂಬಿ ಬದುಕಿಗೆ ಅನೇಕ ರೀತಿಯಲ್ಲಿ ಸಹಕಾರ ನೀಡಿ ಕೇಂದ್ರ ಸಹಕಾರಿ ಬ್ಯಾಂಕು ರಾಷ್ಟ್ರ ಮಟ್ಟದಲ್ಲಿ ಪ್ರಸಿದ್ಧಿ ಗಳಿಸಿದೆ. ಗ್ರಾಮೀಣ ಪ್ರದೇಶದ ಜನರ ಆಶೋತ್ತರಗಳಿಗೆ ಪೂರಕವಾಗಿ ಬ್ಯಾಂಕು ಅಭಿವೃದ್ಧಿಹೊಂದಲಿ ಎಂದರು.
       ತಾ.ಪಂ ಸದಸ್ಯೆ ಪೂರ್ಣಿಮಾ ಖಾರ್ವಿ ಗಣಕೀಕರಣ, ಜಿಪಂ ಸದಸ್ಯ ಅನಂತ ಮೊವಾಡಿ ಭದ್ರತಾ ಕೋಶ ಉದ್ಘಾಟಿಸಿದರು. 
          ಗಂಗೊಳ್ಳಿ ಗ್ರಾಪಂ ಅಧ್ಯಕ್ಷೆ ರೇಷ್ಮಾ ಖಾರ್ವಿ, ಉದ್ಯಮಿ ಎಚ್.ಗಣೇಶ ಕಾಮತ್ ಶುಭಹಾರೈಸಿದರು. ಉದ್ಯಮಿ ಜಿ.ಮಹಮದ್, ಗಂಗೊಳ್ಳಿ ಇಗರ್ಜಿಯ ಧರ್ಮಗುರು ಆಲ್ಪೋನ್ಸ್ ಡಿಲೀಮಾ, ಗಂಗೊಳ್ಳಿ ಮೀನುಗಾರರ ಪ್ರಾಥಮಿಕ ಸಹಕಾರಿ ಸಂಘದ ಅಧ್ಯಕ್ಷ ನಾಗ ಖಾರ್ವಿ, ಗಂಗೊಳ್ಳಿ ಪಂಚ ಗಂಗಾವಳಿ ಸೌಹಾರ್ದ ಕ್ರೆಡಿಟ್ ಕೊ- ಆಪರೇಟಿವ್ ಸೊಸೈಟಿ ಅಧ್ಯಕ್ಷ ರಾಜು ದೇವಾಡಿಗ, ಗಂಗೊಳ್ಳಿ ವಿಎಸ್‌ಎಸ್ ಅಧ್ಯಕ್ಷ ಆನಂದ ಬಿಲ್ಲವ, ಕುಂದಾಪುರ ವಿಎಸ್‌ಎಸ್ ಅಧ್ಯಕ್ಷ ಮಧುಕರ, ಪಡುಕೋಣೆ ವಿಎಸ್‌ಎಸ್ ಅಧ್ಯಕ್ಷ ಸತೀಶ್ ಎಂ.ನಾಯಕ್, ಕೊಲ್ಲೂರು ವಿಎಸ್‌ಎಸ್ ಅಧ್ಯಕ್ಷ ವಿಶ್ವೇಶ್ವರ ಹೆಗಡೆ, ಡಿಸಿಸಿ ಬ್ಯಾಂಕ್ ನಿರ್ದೇಶಕರಾದ ಕಿಶನ್ ಹೆಗ್ಡೆ ಕೊಳ್ಕೆಬೈಲು, ಬಿ.ರಘುರಾಮ ಶೆಟ್ಟಿ, ವಾದಿರಾಜ ಶೆಟ್ಟಿ, ಗಂಗೊಳ್ಳಿ ಶಿಕ್ಷಣ ತಜ್ಞ ಬೈಲೂರು ಮಂಜುನಾಥ ಶೆಣೈ ಉಪಸ್ಥಿತರಿದ್ದರು. 
           ಪ್ರಥಮ ಠೇವಣಿ ಪತ್ರವನ್ನು ವೇದಮೂರ್ತಿ ವೇದವ್ಯಾಸ ಆಚಾರ್ಯ, ಪಾಂಡುರಂಗ ಖಾರ್ವಿಯವರಿಗೆ, ಪ್ರಥಮ ಸಂಚಯ ಖಾತೆ ಪತ್ರವನ್ನು ದುರ್ಗಾರಾಜ್ ಪೂಜಾರಿ ಮತ್ತು ರಿಯಾಜ್ ಅಹಮದ್ ಅವರಿಗೆ, ಲೂಸಿ ರೆಬೆಲ್ಲೊ ಮತ್ತು ಸಾವಿತ್ರಿ ಖಾರ್ವಿಯವರಿಗೆ ಸಾಲ ಪತ್ರ ವಿತರಿಸಲಾಯಿತು. ಮಧುಕರ ಪೂಜಾರಿ ಮತ್ತು ಹಿತೇಶ್ ಮಲ್ಯ ಅವರಿಗೆ ಲಾಕರ್ ಕೀ ಸೌಲಭ್ಯ ನೀಡಲಾಯಿತು. ಸ್ವಸಹಾಯ ಸಂಘಗಳಿಗೆ ಪುಸ್ತಕ ವಿತರಣೆ ನಡೆಯಿತು. 
           ಬ್ಯಾಂಕಿನ ಶತಮಾನೋತ್ಸವ ಅಂಗವಾಗಿ ಹಮ್ಮಿಕೊಂಡಿರುವ ಅದಷ್ಟ ಬಹುಮಾನ ಯೋಜನೆಯಡಿ ವಿಜೇತರಾದವರಿಗೆ ಪ್ರಥಮ ಬಹುಮಾನ 4 ಗ್ರಾಂ ಚಿನ್ನ ಮತ್ತು ದ್ವಿತೀಯ ಬಹುಮಾನ 2ಗ್ರಾಂ ಚಿನ್ನ ವಿತರಿಸಲಾಯಿತು. ಗಂಗೊಳ್ಳಿ ಶಾಖೆಯ ನೂತನ ಪ್ರಬಂಧಕ ಮೋಹನದಾಸ ಹೆಬ್ಬಾರ್ ಮರವಂತೆ, ಕುಂದಾಪುರ ಶಾಖೆಯ ಮಹಾಪ್ರಬಂಧಕ ಬಾಬು ಬಿಲ್ಲವ, ಗಂಗೊಳ್ಳಿ ಶಾಖೆಗೆ ಕಟ್ಟಡ ಒದಗಿಸಿಕೊಟ್ಟ ವೆಂಕಟೇಶ ಮಲ್ಯ ಅವರನ್ನು ಸನ್ಮಾನಿಸಲಾಯಿತು. ನವೋದಯ ಸಂಘದ ಸದಸ್ಯರಾಗಿದ್ದು ಆಕಸ್ಮಿಕವಾಗಿ ಅಗಲಿದ ಇಬ್ಬರಿಗೆ ಟ್ರಸ್ಟ್‌ನ ಚೈತನ್ಯ ವಿಮೆ ಯೋಜನೆಯಡಿ ತಲಾ ರೂ.25 ಸಾವಿರ ನೆರವಿನ ಚೆಕ್ ಹಸ್ತಾಂತರಿಸಲಾಯಿತು.
     ಬ್ಯಾಂಕಿನ ನಿರ್ದೇಶಕ ರಾಜು ಪೂಜಾರಿ ಸ್ವಾಗತಿಸಿದರು. ಪತ್ರಕರ್ತ ಸುಬ್ರಹ್ಮಣ್ಯ ಪಡುಕೋಣೆ ಕಾರ್ಯಕ್ರಮ ನಿರೂಪಿಸಿದರು. ಮಹಾಪ್ರಬಂಧಕ ಜಿ. ಬಾಬು ಬಿಲ್ಲವ ವಂದಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com