ಕಡಲ್ಕೊರೆತ: ಕ್ರಮಕ್ಕೆ ಸೂಚನೆ

ಬೈಂದೂರು: ತೀವ್ರ ಕಡಲ್ಕೊರೆತ ಸಂಭವಿಸಿರುವ ಮರವಂತೆ ಮೀನುಗಾರಿಕಾ ಹೊರಬಂದರು, ಕಿರಿಮಂಜೇಶ್ವರದ ಹೊಸಹಿತ್ಲು ಮತ್ತು ಶಿರೂರಿನ ಕಳಿಹಿತ್ಲು ಪ್ರದೇಶಗಳಿಗೆ ಶಾಸಕ ಕೆ. ಗೋಪಾಲ ಪೂಜಾರಿ ಗುರುವಾರ ಹಿರಿಯ ಅಧಿಕಾರಿಗಳೊಂದಿಗೆ ಭೇಟಿ ನೀಡಿ ಪರಿಶೀಲಿಸಿದರು. 
   ಬಂದರು ಮತ್ತು ಒಳನಾಡು ಜಲಸಾರಿಗೆ ಇಲಾಖೆ ನಿರ್ದೇಶಕ ಕ್ಯಾಪ್ಟನ್ ಆರ್.ಮೋಹನ್, ಅಧೀಕ್ಷಕ ಎಂಜಿನಿಯರ್ ಕೆ.ಎಸ್.ಜಾಂಬಾಳಿ, ಕಾರ್ಯನಿರ್ವಾಹಕ ಎಂಜಿನಿಯರ್ ಟಿ.ಎಸ್. ರಾಥೋಡ್, ಸಹಾಯಕ ಕಾರ‌್ಯನಿರ್ವಾಹಕ ಎಂಜಿನಿಯರ್ ನಾಗರಾಜ ಅವರೊಂದಿಗಿದ್ದರು. 
   ಕಳಿಹಿತ್ಲು ಮತ್ತು ಹೊಸಹಿತ್ಲುವಿನಲ್ಲಿ ತೀರಪ್ರದೇಶ ಸಮುದ್ರ ಸೇರಿದೆ. ರಸ್ತೆಗಳಿಗೆ ಹಾನಿಯಾಗಿದೆ. ಕೆಲವು ಮನೆಗಳು ಅಪಾಯದಲ್ಲಿವೆ. ಇಲ್ಲಿ ಈಗಾಗಲೇ ಆರಂಭಿಸಿರುವ ತಡೆಗೋಡೆ ನಿರ್ಮಾಣ ಕಾಮಗಾರಿ ಮುಂದುವರಿಸಬೇಕು. ಮರವಂತೆ ಮೀನುಗಾರಿಕಾ ಹೊರಬಂದರು ನಿವೇಶನದಲ್ಲಿ ಕಡಲ್ಕೊರೆತದೊಂದಿಗೆ ಏಕೈಕ ಸಂಪರ್ಕ ರಸ್ತೆ ಅಪಾಯದಲ್ಲಿದೆ. ತೀರ ಪ್ರದೇಶ ಕಡಲಿಗಾಹುತಿಯಾಗಿದೆ. ಇಲ್ಲಿ ಶಾಶ್ವತ ತಡೆಗೋಡೆ ನಿರ್ಮಿಸುವುದರಿಂದ ಬಂದರು ಚಟುವಟಿಕೆಗಳಿಗೆ ತೊಂದರೆಯಾಗುವುದರಿಂದ ರಸ್ತೆ ರಕ್ಷಣೆಗೆ ಶಾಶ್ವತ ಕ್ರಮ ಕೈಗೊಂಡು, ಉಳಿದೆಡೆ ತಾತ್ಕಾಲಿಕ ರಕ್ಷಣೆ ಒದಗಿಸಬೇಕು ಎಂದು ನಿರ್ಧರಿಸಲಾಯಿತು. ಈ ಕ್ರಮಗಳನ್ನು ತಕ್ಷಣ ಆರಂಭಿಸಬೇಕು ಎಂದು ಅಧಿಕಾರಿಗಳಿಗೆ ತಿಳಿಸಿದ ಶಾಸಕರು ಜಿಲ್ಲಾಧಿಕಾರಿಗಳ ಪ್ರಕತಿ ವಿಕೋಪ ಪರಿಹಾರ ನಿಧಿಯಿಂದ ಮತ್ತು ಸರಕಾರದ ವಿಶೇಷ ಅನುದಾನದಿಂದ ಅಗತ್ಯ ಮೊತ್ತ ಕೊಡಿಸುವುದಾಗಿ ತಿಳಿಸಿದರು. 
     ತಾಪಂ ಸದಸ್ಯ ಎಸ್. ರಾಜು ಪೂಜಾರಿ, ಮೀನುಗಾರ ಮುಖಂಡರಾದ ಎಸ್. ಮದನ್‌ಕುಮಾರ, ಮಂಜುನಾಥ ಖಾರ್ವಿ, ನಾರಾಯಣ ಅಳ್ವೆಗದ್ದೆ, ಸಿ. ಎಸ್. ಖಾರ್ವಿ, ಸೋಮಯ್ಯ ಖಾರ್ವಿ, ರಾಮಕಷ್ಣ ಖಾರ್ವಿ, ಸ್ಥಳೀಯ ಪ್ರಮುಖರಾದ ಎಂ. ವಿನಾಯಕ ರಾವ್, ಪುಟ್ಟಯ್ಯ ಪೂಜಾರಿ, ಶಿರೂರು ಗ್ರಾ. ಪಂ. ಅಧ್ಯಕ್ಷ ರಾಮ ಮೇಸ್ತ, ಮರವಂತೆ ಅಧ್ಯಕ್ಷೆ ಕೆ. ಎ. ಸುಗುಣಾ, ಮತ್ತಿತರರು ಹಾಜರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com