ರಾಜ್ಯ ಮಟ್ಟದ ಹೂವಿನ ಕೋಲು ಸ್ಪರ್ಧೆ ಉದ್ಘಾಟನೆ

ಕೋಟ: ಎಳೆಯ ಮಕ್ಕಳಲ್ಲಿ ಪೌರಾಣಿಕ ವಿಚಾರ ಧಾರೆ ಮತ್ತು ಅದರ ಮೌಲ್ಯವನ್ನು ಅರಿಯಲು ಹಾಗೂ ಯಕ್ಷಗಾನವನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಹೂವಿನ ಕೋಲು ಕಾರ್ಯಕ್ರಮ ಸಹಕಾರಿಯಾಗಿದೆ. ಆರಂಭದಲ್ಲಿ ನವರಾತ್ರಿ ಸಂದರ್ಭ ಮನೆ ಮನೆಗೆ ತೆರಳಿ ಪ್ರದರ್ಶನ ನೀಡುತ್ತಿದ್ದ ಹೂವಿನ ಕೋಲು ತಂಡ ಇಂದು ಮಾಯಾವಾಗಿದೆ. ಆದರೆ ಕಳೆದ 15 ವರ್ಷಗಳಿಂದ ಹಂಗಾರಕಟ್ಟೆ ಯಕ್ಷಗಾನ ಕಲಾ ಕೇಂದ್ರ ಈ ಕಲೆಯನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಹಮ್ಮಿಕೊಂಡ ಈ ಕಾರ್ಯಕ್ರಮ ಶ್ಲಾಘನೀಯ ಎಂದು ಮಣಿಪಾಲ ಭಾರತೀಯ ವಿಕಾಸ ಟ್ರಸ್ಟ್ ಆಡಳಿತ ನಿರ್ದೇಶಕ ಕೆ.ಎಂ. ಉಡುಪ ಹೇಳಿದರು. 

ಹಂಗಾರಕಟ್ಟೆ ಯಕ್ಷಗಾನ ಕಲಾ ಕೇಂದ್ರದ ಸದಾನಂದ ರಂಗ ಮಂಟಪದಲ್ಲಿ ಮಣಿಪಾಲ ಭಾರತೀಯ ವಿಕಾಸ ಟ್ರಸ್ಟ್, ಮಣೂರು ಗೀತಾನಂದ ಟ್ರಸ್ಟ್, ಸಾಲಿಗ್ರಾಮ ಡಿವೈನ್ ಪಾರ್ಕನ ಸ್ವಾಸ್ಥ್ಯ ಹೆಲ್ತ್‌ಕೇರ್ ಮತ್ತು ರಿಸರ್ಚ್ ಸೆಂಟರ್, ಸಾಲಿಗ್ರಾಮ ರಮ್ಯ ಪ್ರಿಂಟರ್ಸ್‌ ಇನ್ನಿತರ ಸಂಘ ಸಂಸ್ಥೆಗಳ ಸಹಯೋಹದೊಂದಿಗೆ ದಿ. ಟಿ.ಎ. ಪೈ ಸವಿನೆನಪಿನಲ್ಲಿ ಆಯೋಜಿಸಲಾದ ರಾಜ್ಯ ಮಟ್ಟದ ಹೂವಿನ ಕೋಲು ಸ್ಪರ್ಧೆ ಉದ್ಘಾಟಿಸಿ ಅವರು ಮಾತನಾಡಿದರು. 

ಯಕ್ಷಗಾನ ಕಲೆಗೆ ಇಂದು ಪೋಷಕರಿದ್ದಾರೆ. ಆದರೆ ನಿಜವಾಗಿ ಯಕ್ಷಗಾನಕ್ಕೆ ಕೊರತೆ ಇರುವುದು ಕಲಾವಿದರದ್ದು. ಇಂದು ಯಕ್ಷಗಾನ ಕ್ಷೇತ್ರದ ಪ್ರಶಸ್ತಿಗಳು ನಿಜವಾದ ಕಲಾವಿದರಿಗೆ ಸಲ್ಲುತ್ತಿಲ್ಲ, ಇನ್ನೂ ಮುಂದೆಯಾದರೂ ಕಲಾವಿದನಲ್ಲಿರುವ ಕಲೆಯ ಗುಣಮಟ್ಟವನ್ನು ಗಮನಿಸಿ ಪ್ರಶಸ್ತಿ ನೀಡಬೇಕು ಎಂದರು. 

ಯಕ್ಷಗಾನ ಕಲಾ ಕೇಂದ್ರದ ಅಧ್ಯಕ್ಷ ಎ.ಎಸ್.ಎನ್. ಹೆಬ್ಬಾರ್ ಅಧ್ಯಕ್ಷತೆ ವಹಿಸಿದ್ದರು. ಮುಖ್ಯ ಅತಿಥಿಗಳಾಗಿ ನಿವೃತ್ತ ಶಿಕ್ಷಕ ಶ್ರೀನಿವಾಸ ಸೋಮಯಾಜಿ ಉಪಸ್ಥಿತರಿದ್ದರು. ಯಕ್ಷಗಾನ ಕಲಾ ಕೇಂದ್ರದ ಕಾರ್ಯದರ್ಶಿ ರಾಜಶೇಖರ್ ಹೆಬ್ಬಾರ್ ಸ್ವಾಗತಿಸಿದರು. ರಾಮಚಂದ್ರ ಐತಾಳ್ ಕಾರ್ಯಕ್ರಮ ನಿರೂಪಿಸಿದರು. ಸ್ಪರ್ಧೆಯಲ್ಲಿ 10 ತಂಡಗಳು ಭಾಗವಹಿಸಿದ್ದು, ನಿರ್ಣಾಯಕರಾಗಿ ಸಾಬರಕಟ್ಟೆ ಅಶೋಕ ಆಚಾರ್ಯ, ಕೃಷ್ಣ ಸ್ವಾಮಿ ಜೋಶಿ ಬ್ರಹ್ಮಾವರ ಮತ್ತು ಚಿಕ್ಕು ಪೂಜಾರಿ ಭಾಗವಹಿಸಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com