ಕಲೆಯಲ್ಲಿ ಚಿತ್ರಕಲೆಗೆ ಅಗ್ರಗಣ್ಯ ಸ್ಥಾನ: ಓಂ ಗಣೇಶ್

ಬೈಂದೂರು: ಕಲೆಗಳಲ್ಲೂ ಚಿತ್ರಕಲೆಗೆ ಅಗ್ರಗಣ್ಯ ಸ್ಥಾನವಿದೆ. ಒಬ್ಬ ಚಿತ್ರ ಕಲಾವಿದ ಮೊದಲು ಚಿತ್ರ ಬಿಡಿಸಿ, ಬಳಿಕ ಆ ಚಿತ್ರದಲ್ಲಿ ಬೇಡವಾಗಿರುವುದನ್ನು ತೆಗೆಯುವ ಮೂಲಕ ಚಿತ್ರಕ್ಕೆ ಜೀವ ಕೊಡುತ್ತಾನೆ ಎಂದು ಅಂತರಾಷ್ಟ್ರೀಯ ಜಾದೂಗಾರ ಓಂ ಗಣೇಶ್ ಉಪ್ಪುಂದ ಹೇಳಿದರು. 

ಇಲ್ಲಿನ ಶಾರದಾ ವೇದಿಕೆಯಲ್ಲಿ ಸುರಭಿ ಬೈಂದೂರು, ಚಿತ್ತಾರ ಉಪ್ಪುಂದ ಹಾಗೂ ರೋಟರಿ ಕ್ಲಬ್ ಬೈಂದೂರು ಇವರ ಜಂಟಿ ಆಶ್ರಯದಲ್ಲಿ ನಡೆದ ರಾಜ್ಯ ಮಟ್ಟದ ಕಲಾವಿದರ ಚಿತ್ರಕಲಾಕತಿಗಳ ಪ್ರದರ್ಶನ ಹಾಗೂ ಕರ್ನಾಟಕ ರಾಜ್ಯೋತ್ಸವ ಅಂಗವಾಗಿ ಬಾರಿಸು ಕನ್ನಡ ಡಿಂಡಿಮ ಹಿಗ್ಗಿನ ಬುಗ್ಗೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದರು. 

ಕಾರ್ಯಕ್ರಮವನ್ನು ಉದ್ಘಾಟಿಸಿದ ಕುಂದಾಪುರದ ಆಳ್ವಾಸ್ ವಿರಾಸತ್ ನುಡಿಸಿರಿ ಘಟಕದ ಅಧ್ಯಕ್ಷ ಸುಬ್ರಹ್ಮಣ್ಯ ಶೆಟ್ಟಿ ಮಾತನಾಡಿ ಕನ್ನಡ ಭಾಷೆ ಉತ್ತಮ ಸಂಸ್ಕಾರ, ಸಂಸ್ಕೃತಿಯಿಂದ ಕೂಡಿದೆ. ಈ ಸಂಸ್ಕಾರ ಸಂಸ್ಕೃತಿಯು ನಮ್ಮ ನಾಟಕ, ಸಾಹಿತ್ಯ, ಯಕ್ಷಗಾನದ ಕೊಡುಗೆಯಾಗಿದೆ. ಇಂದು ಬಹುತೇಕ ಕನ್ನಡ ಪತ್ರಿಕೆಯನ್ನು 35 ವರ್ಷ ಮೇಲ್ಪಟ್ಟವರು ಮಾತ್ರ ಹೆಚ್ಚಾಗಿ ಓದುತ್ತಿದ್ದಾರೆ. ಹೀಗೆ ಮುಂದುವರೆದರೆ ಮುಂದಿನ 20 ವರ್ಷಗಳಲ್ಲಿ ಕನ್ನಡ ಸಾಹಿತ್ಯ, ಪತ್ರಿಕೆ ಓದುವುವರ ಸಂಖ್ಯೆ ಗಣನೀಯವಾಗಿ ಇಳಿಮುಖವಾದರೂ ಅಚ್ಚರಿಪಡಬೇಕಿಲ್ಲ ಎಂದರು. ಕಳೆದ ಬಾರಿ ಎಸ್ಸೆಸ್ಸೆಲ್ಸಿ ಪರೀಕ್ಷೆಯಲ್ಲಿ ವಲಯದಲ್ಲೇ ಅತ್ಯಧಿಕ ಅಂಕಗಳಿಸಿದ ಪವಿತ್ರಾ ಆಲೂರು ಅಧ್ಯಕ್ಷತೆ ವಹಿಸಿದ್ದರು. 

ತಾಪಂ ಸದಸ್ಯ ರಾಜು ಪೂಜಾರಿ, ಬೈಂದೂರು ರೋಟರಿ ಅಧ್ಯಕ್ಷ ಟಿ. ಆರ್. ಹುದಾರ್, ಚಿತ್ರ ಕಲಾವಿದ ಭೋಜು ಹೊಂಡ, ಉಪ್ಪುಂದ ಚಿತ್ತಾರದ ಅಧ್ಯಕ್ಷ ಮಂಜುನಾಥ ಮಯ್ಯ, ಸುರಭಿ ನಿರ್ದೇಶಕ ಕೃಷ್ಣಮೂರ್ತಿ ಉಡುಪ ಉಪಸ್ಥಿತರಿದ್ದರು. ಬಳಿಕ ಮಕ್ಕಳ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಿತು. ಗಣಪತಿ ಹೋಬಳಿದಾರ್ ಸ್ವಾಗತಿಸಿದರು.


Surabhi-Byndoor
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com